ӘКИЯТ-BELEМ

Кадерле нәни дусларыбыз, хөрмәтле әти-әниләр!
⠀
Татар Дәүләт «Әкият» курчак театры масштаблы уникаль «ӘКИЯТ-BELEМ» мәдәни-мәгариф проекты тәкъдим итә.
⠀
Көзге кичтә ниләр эшлисез? Китап укучылар күпме арабызда? Бүгенге дөньяда – мәгълүмат технологияләре үсеш алган заманда – баланы китапка җәлеп итү шактый катлаулыга әверелә бара.
⠀
Күп ата-аналар балада китап уку теләген ничек уятырга дип баш вата.
⠀
«ӘКИЯТ-BELEМ» проекты даими рәвештә китаплар укырга, татар әдәбиятына, язучыларның иҗатына кызыксыну уятуны, балаларда сәнгать әсәрен тулы күләмдә кабул итү сәләтен үстерүне күздә тота.
⠀
Проект кысаларында өч форматтагы лекция-очрашулар планлаштырылган.
⠀
Беренче формат-автор катнашында яңа балалар китапларын тәкъдим итү. Татарстанның әйдәп баручы авторлары белән турыдан-туры аралашуы һәм хәзерге татар әдәбиятының иң күренекле вәкилләре белән танышу. Тамашачылар белән тере элемтә-авторга да, укучыга да үсеш өчен менә дигән стимул. Очрашу кысаларында шулай ук, балалар өчен әдәби викториналар, китап күргәзмәләре һәм уеннар, танылган балалар язучылары әсәрләре буенча театральләштерелгән тамашалар оештырыла.
⠀
«Әкият-BELEM» проектын тормышка ашыру барышында милли әдәбиятка игътибар җәлеп итүгә юнәлдерелгән 30га якын очрашу үткәрү планлаштырыла.
⠀
Беренче кичәбездә без Фәйрүзә Мөслимованың «Татарча Әлифба» китабы белән танышып үтәчәкбез.
Китап уку сезнең өчен дә, балагыз өчен дә матур гадәткә әйләнсен.
⠀
Презентация үткәрү урыны: «Әкият» курчак театрының Кече залы
Башлана: 10 октябрь, 16-00 сәгатьтә.
Керү бушлай. Әлеге чарада катнашу өчен алдан теркәлү мәҗбүри. E-mail: Ekiyat-belem@yandex.ru
⠀
Чакырылган кунакларга театр музеена бушлай керү мөмкинлеге булачак.